Actualidade A Coruña, 3 de abril de 2008 A folga será indefinida a partir do 12 de abril Multiplícanse os actos de protesta do persoal de Albada   CIG-Comunicación- cig.prensa@galizacig.com   Traballadores de Albada concéntranse o 2 de abril fronte ao Concello da Coruña.   Os traballadores de Albada, sociedade concesionaria da planta de tratamento de residuos de A Coruña, acentuaron as protestas nestes últimos días con concentracións diante da empresa e do Concello. Os representantes dos empregados acordaron que a folga, cuxa convocatoria fora anunciada hai semanas, sexa indefinida a partir das 0:00 horas do 12 de abril. O comité de empresa informa que o lixo continúa a amorearse na planta de Nostián, nomeadamente máis de 10.000 toneladas, desde que os traballadores renunciaron a realizar horas extraordinarias como medida de protesta para que dirección sente a negociar o Convenio Colectivo. O complexo atópase case ao límite de capacidade e apenas se recicla o 2% do lixo. Os representantes dos empregados, ademais, denuncian que grande parte dos residuos da planta están sendo trasladados a Sogama sen recibir nin a reciclaxe nin o tratamento axeitados. O comité presentará novas denuncias na Inspección de Traballo en relación coa coordinación de actividades empresariais na planta de Nostián, coa quenda de noite ou sobre os incumprimentos do Real Decreto 664/1997 sobre Axentes Biolóxicos. Segundo os representantes do persoal, Albada, ademais de incumprir a lexislación en materia de saúde laboral, atenta tamén contra o medio ambiente, posto que verte directamente ao mar. Os traballadores de Albada proseguirán coas concentracións en María Pita para lle reclamar ao Concello coruñés que force a empresa a iniciar a negociación. Calendario de mobilizacións - 4 de abril: 10:30 horas, concentración diante do Concello da Coruña - 5 de abril: 12:00 horas, concentración diante da planta de Nostián. Contra as 18:00 horas, os traballadores comezarán, na Praza da Palloza, o reparto de panfletos informativos pola cidade. - 6 de abril: Desde as 6:00 até as 20:00 horas, concentración diante da planta de Nostián. - 8 de abril: Desde as 13:00 até as 15:00 horas, concentración diante da planta de Nostián. - 10 de abril: Ás 9:00 horas e se a empresa segue sen sentar a negociar, concentración en Santiago de Compostela, diante dos Edificios Administrativos de San Caetano da Xunta de Galiza. - 12 de abril: A partir das 0:00 horas, folga indefinida

Informacións relacionadas 12/03/2008 O 31 de marzo manifestaranse diante do Concello de A Coruña Os traballadores de Albada irán a folga o 12 de abril

Confederación Intersindical Galega www.galizacig.com

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta