|
Actualidade CIG-Comunicación-
A porta dos Xulgados na cidade de Vigo foi o escenario dun novo acto de protesta da Sección Sindical da CIG Telemárketing en Bosch, contra a política laboral da multinacional alemá no seu centro de chamadas de Vigo, unha política que a CIG tacha de represiva. Este foi o primeiro xuízo celebrado polas demandas presentadas contra a empresa. Ao longo do último mes celebráronse varios actos de conciliación, estando outros previstos para os vindeiros días. Cabe lembrar que Bosch despediu a unha delegada (xuízo celebrado hoxe) e a unha candidata da CIG, e emprendeu unha campaña contra outras persoas vinculadas ao Sindicato nacionalista con sancións e persecución sindical. Polo de agora só dous dos actos de conciliación celebráronse con avinza. No primeiro caso, o dun delegado da CIG ao que lle foran modificadas as condicións de traballo, acordouse repoñelo nas condicións anteriores. No segundo, a empresa concedeu, tal e como prevé a Lei, unha redución de xornada a unha traballadora para o coidado de fillos, tal e como ela solicitaba. Neste último caso, esta traballadora foi sancionada aos poucos días de solicitar a redución que lle fora denegada. A conciliación sobre a sanción foi sen avinza, polo que haberá que agardar ao xuízo. Durante o xuízo polo despedimento da delegada, quedou en evidencia que a traballadora foi cambiada de centro de traballo aos tres días de coñecer a empresa que ía na candidatura da CIG, sendo trasladada a un centro de traballo con menos persoal e rebaixándolle as funcións que realizada. Posteriormente, o día 20 de decembro saíu elixida delegada e o día 21 participou na folga convocada para o sector de telemárketing. O cese na empresa foille notificado o día 27 de decembro. Para a Sección Sindical da CIG, Bosch ten en marcha unha campaña contra o sindicato despois de gañar rotundamente as eleccións para a ampliación do comité de empresa, e do éxito da folga, co fin de tratar de amedrentar ao persoal para que se dobregue e renuncie aos seus dereitos laborais. |
||||||
|
||||||
|
|
||||||
|
