Actualidade / Artigo A Coruña, 28 de novembro de 2007 El País ofende e teme   Xurxo Martínez Crespo- xurxomartinez@cantv.net   Eleccións en Bolivia. Evo Morales de costas. Manifestación de apoio ao MAS en Bolivia.   Na edición impresa de El País (El Pasquín) de Madrid, na portada, podemos ler o seguinte titular: “Evo Morales impone su Constitución en Bolivia entre disturbios”. O titular é todo un poema de exercicio gobbelsiano (perdón polo neoloxismo). En primeiro lugar a Constitución de Bolivia non é de Evo Morales, senón de Bolivia, é dicir das bolivianas e bolivianos. Non foi imposta senón aprobada por maioría, pola maioría que ten o partido Movimiento Al Socialismo (MAS) e non os outros partidos. Unha pergunta retórica sería coñecer as causas polas que o MAS ten a maioría e os restantes partidos como Poder Democrático y Social (PODEMOS), Movimiento Nacionalista Revolucionario (MNR), Unidad Nacional (UN), Movimiento Bolivia Libre (MBL), Alianza Social (AS) e Concertación Nacional (CN) a minoría. A razón é que o MAS foi o máis votado e os outros os menos votados, polo tanto, en democracia a maior número de votos maior representatividade e maior poder. Este argumento tan lóxico é sistematicamente ocultado polo xornal El País cada vez que toca o tema de Bolivia ou Venezuela (cal será a próxima vítima?). Neste xornal madrileño, que se subtitula global se cadra polo número de globos nas súas páxinas, a distorsión e o irrespecto cara ao lector, convertéronse en mandamentos do Libro de estilo. Como 117 deputados opositores non son máis que 138 do partido gobernante, así é a democracia, deciden máis os últimos que os primeiros. Pero este xornal é incombustíbel á hora de construír medias verdades. Así na portada e na páxina 2 asegura que Evo Morales impuxo a “súa Constitución” mais lendo a noticia, no terceiro parágrafo, lemos que o que se aprobou (aquí non utilizan a palabra imposición) foi o “índice da Constitución” e de aquí en adiante deberá votarse o texto artigo por artigo. Pregúntome eu, era esa a imposición de Evo Morales? Un índice? A obrigatoriedade e posibilidade que a oposición debata artigo por artigo? Despois de aprobados os textos, os artigos da Constitución boliviana deberán ser aprobados polo pobo boliviano en referéndum. É iso unha imposición? El País dá voz (e máis votos dos que ten) ao opositor branco Jorge “Tuto” Quiroga do partido PODEMOS con 60 escanos: “É unha Constitución (máis ben un índice) acuartelada, escrita con fusís e baionetas e manchada con sangue sucrense”. Que escribiría El País se unha poboación politicamente analfabeta, despois de 40 anos de ditadura, aprobase unha Constitución e unha monarquía con só o 54,9% dos votos? Foi o prócer uruguaio José Gervasio Artigas quen dixo “Con la verdad no ofendo ni temo”. El País ofende e teme.

Xurxo Martínez Crespo. (Máis artigos...)

Confederación Intersindical Galega www.galizacig.com ÚLTIMA REVISIÓN: 28/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta