Actualidade / Artigo Vigo, 24 de novembro de 2007 (Publicado en Diario de Ferrol o 22/11/2007) O castelo do Casón   Manuel Mera- fs@galizacig.net   O lugar fica entre Ponte Mera e Cariño, moi próximo ao estremo deste municipio. Pra chegar ao castelo do Casón débese coller unha estrada que sube de Casón á Capelada. A medio camiño veremos unha inmensa mina a ceo aberto de dunita. Grandes camións, maquinas que trituran e peneiran. Unha paisaxe negra, arrodeada polo verde escuro do piñeiral e as cores ocres do eucalipto, que a seca fai aínda máis agresiva á vista. (Fotos: ©galizacig.com).   No extenso concello de Ortigueira, que como toda a bisbarra de Ortegal abraia pola súa natureza salvaxe e fermosa, atópase un cumio rochoso, no que na alta Idade Media existiu unha fortaleza á que se chamou castelo do Casón (nome do río que pasa uns centos de metros máis abaixo). O lugar fica entre Ponte Mera e Cariño, moi próximo ao estremo deste municipio. Pra chegar débese coller unha estrada que sube de Casón á Capelada. A medio camiño veremos unha inmensa mina a ceo aberto de dunita. Grandes camións, maquinas que trituran e peneiran. Unha paisaxe negra, arrodeada polo verde escuro do piñeiral e as cores ocres do eucalipto, que a seca fai aínda máis agresiva á vista. As sinais pra se achegar ao castelo non son as necesarias, por exemplo, no último cruce unha indicación di que a douscentos metros fica a fortaleza, en realidade son moitos máis. A uns seis centos metros hai que coller un carreiro e despois seguir (intuitivamente) unha varanda de madeira que marca unha estreita verea ateigada de mato e toxo que abrangue todo o xacemento. As ruínas seica manteñen aínda parte das murallas (segundo di a información existente no alto do morro), e todo fai pensar que o foxo é o que primitivamente arrodeaba a fortaleza. As vistas son impresionantes, xa que se nos ofrece a panorámica completa da ría de Ortigueira e Ladrido. Só por isto as peripecias pagan a pena. Vese que a ruína foi no seu día escavada e se lle fixo unha mínima infraestrutura pra facilitar o aceso, o que sen dúbida é digno de felicitación. O que non se comprende, e resulta inaceptábel, é o abandono posterior. De pouco vale investir, anunciar nos folletos turísticos, se despois os lugares non se manteñen acondicionados e coa sinalización necesaria... pra alén de quen teña as responsabilidades.

Manuel Mera, secretario confederal de Formación Sindical e Comunicación da CIG. (Máis artigos...)

Confederación Intersindical Galega www.galizacig.com ÚLTIMA REVISIÓN: 24/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta