Actualidade Vigo, 1 de novembro de 2007 Mediación da Delegación de Traballo Convocada folga con carácter indefinido en Cespa para o 12 de novembro   CIG-Comunicación- cig.prensa@galizacig.com   Dous meses despois da folga polo Convenio Colectivo, Cespa decidiu impor unha sanción ao Comité de Folga por uns supostos “incumprimento dos servizos mínimos e por permitir a grupos de piquetes que se botara lixo nos parques e xardíns”, así como despediu a un traballador por unha suposta “agresión ao xerente”. (Foto: ©galizacig.com).   Os traballadores e traballadoras de CESPA, empresa concesionaria do servizo de limpeza e mantemento dos parques e xardíns do Concello de Vigo, decidiron en asemblea convocar unha nova folga indefinida polo despedimento dun traballador e a sanción imposta ao Comité de Folga. Coa mediación de Traballo conseguiron que a sanción non se faga efectiva. O martes 30 de outubro tiveron lugar dúas xuntanzas na Delegación de Traballo da Xunta de Galiza en Vigo relacionadas coa empresa Cespa. A primeira, ás once da mañá, tiña que ver coa sinatura do Convenio da empresa, polo que se mantivo unha folga no mes de xullo pasado, e as doce e media da mañá desenvolveuse outra reunión do Comité e a empresa, coa mediación de Traballo, pola convocatoria dunha nova folga nesta concesionaria do servizo de limpeza de parques e xardíns, porque, dous meses despois da folga, a empresa decidiu impor unha sanción ao Comité de Folga por uns supostos “incumprimento dos servizos mínimos e por permitir a grupos de piquetes que se botara lixo nos parques e xardíns”, así como despediu a un traballador por unha suposta “agresión ao xerente”. Ante estas sancións e o propio despedimento a asemblea de traballadores e traballadoras de Cespa o pasado 25 de outubro decidiu por 49 votos a favor e 1 abstención convocar unha nova folga con carácter indefinido a partir do 12 de novembro. A Delegación de Traballo, en canto coñeceu a notificación desta folga, convocou a xuntanza de mediación da que vimos de falar. Sanción contra o dereito á folga A sanción imposta ao Comité de Folga é dun mes sen salario nin emprego, algo que o Comité de Folga non está “disposto a permitir nin un só día de sanción por exercermos o noso dereito á folga”. O Comité de Empresa ofrece tamén unha saída negociada para o despedido, xa que ten 60 anos, polo que sería posíbel “negociar unha xubilación parcial”. A empresa nesta primeira xuntanza escoitou a proposta do Comité de Empresa e pediu outra reunión para avaliar con máis calma esta solución, pero adiantaron que desde esta xuntanza deixaban sen efecto as sancións. A próxima reunión sería en todo caso antes do día 12, data prevista para a folga. Alfredo Filgueiras, presidente do Comité de Empresa e da CIG, sinalou que “é un paso importante que non se efectivicen as sancións, e parece posíbel un punto de encontro, aínda que até que todo non apareza recollido nun papel non poderemos estar tranquilos”.

Informacións relacionadas 31/07/2007 A presión dos traballadores, a presión social e a política foron claves Remata a folga de CESPA en Vigo tras un “duro” proceso de negociación 27/07/2007 Sancionan a 7 traballadoras/es por negarse a cumprir uns servizos mínimos abusivos Masivo seguimento da folga indefinida de CESPA en Vigo

Confederación Intersindical Galega www.galizacig.com ÚLTIMA REVISIÓN: 01/11/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta