Actualidade / Artigo Vigo, 5 de outubro de 2007 (Publicado en Diario de Ferrol o 04/10/2007) Un povo aldraxado e rebelde   Manuel Mera- fs@galizacig.net   Grupo de segadores/as. Almanaque Gallego, 1903.   Juaquin Costa, aragonés, moi activo na vida política do Estado español no limiar do século pasado, quixo facer reformas desde arriba, mais desenganado optou polo republicanismo seica pra “facelas desde abaixo”. Entre as súas teimas estivo a problemática agraria e o regadío, sobre este tema publicou “Política Hidráulica (Misión social de los riegos en España)”. Neste texto, no que fai referencia só dúas veces a Galiza, na segunda realiza un comentario ofensivo, aldraxante, porén que ademais ten un importante valor histórico e político. Á metade do libro, despois de poñer como modelo a Aragón fai unha comparación con Galiza, da que di “que estivo dous meses bandeira en man, organizando xuntas de defensa e ameazando á nación até con separarse e anexionarse a Portugal, só porque a Facenda, na súa desesperación, trataba de lle restar un par de garvanzos” (…coitadiño o governo central). Ademais da pouca consideración que polo noso país e a súa xente ten este destacado político español reformista (algo común, aínda hoxe), o certo é que ao mesmo tempo amosa unha sociedade nada submisa, rebelde, que protesta polo que considera inxusto e abafante. Un dado que desminte a caricatura que pretende apresentar (na actualidade) ao noso povo como secularmente conformista e incapaz de se enfrontar aos que o asoballan. Indica tamén que había sectores importantes e hexemónicos na política galega que asumiron a direción desta protesta atrevida e teimuda (o que é impensábel no último medio século). E, non se pode pasar por alto, a forza que tiñan daquela os vínculos con Portugal, tanto que se ameazaba a Madrid con recuperar a unidade perdida coa nación irmán. Ou sexa, facíase bandeira do arredismo, cando hoxe é tan temido (mesmo falar delo).

Manuel Mera, secretario confederal de Formación Sindical e Comunicación da CIG. (Máis artigos...)

Confederación Intersindical Galega www.galizacig.com ÚLTIMA REVISIÓN: 05/10/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta