Actualidade Santiago, 14 de febreiro de 2007 Comezaron o pasado 29 de xaneiro unha folga de carácter indefinido Corte de tráfico en Compostela das traballadoras da limpeza do Concello en demanda de equiparación salarial   CIG-Comunicación- cig.prensa@galizacig.com   As traballadoras de Facility Services, un total de 30 mulleres, comezaron o pasado 29 de xaneiro unha folga de carácter indefinido ante a pasividade tanto da empresa como do Concello para sentar a negociar. (Fotos: ©galizacig.com 13/02/2007). As traballadoras da subcontrata de limpeza do Concello cortaron o tráfico na praza de Galiza e na rúa Galeras, logo dunha cazolada diante do Concello.   As traballadoras de Facility Services, empresa que realiza o servizo de limpeza do Concello de Santiago, cortaron o tráfico, o martes 13 de febreiro, primeiro na praza de Galiza e posteriormente na rúa Galeras, logo dunha cazolada diante do Concello. Demandan a equiparación salarial co persoal do propio Concello e unha mellora das súas condicións laborais. As traballadoras desta subcontrata, un total de 30 mulleres, comezaron o pasado 29 de xaneiro unha folga de carácter indefinido, segundo a delegada sindical da CIG, Milagros Salgado, ante a pasividade tanto da empresa como do Concello para sentar a negociar. CIG-Servizos explica que todo parece indicar que a folga será longa, tal e como ocorreu en casos semellantes nos que se demandaba a equiparación. Neste sentido lembran a levada a cabo, recentemente, polo persoal da limpeza das instalacións da Xunta de Galiza en Lugo. Desde a CIG-Servizos tamén se salienta que outro dos obxectivos é denunciar publicamente a situación das subcontratas, non só na Administración pública, senón tamén naquelas empresas privadas que “o único que buscan é un abaratamento dos custos a costa da clase traballadora xa que en todas estas empresas as condicións de traballo dos convenios propios ou de sector son moi superiores aos das subcontratas”. Mellora das condicións de traballo Tamén se pretenden denunciar as condicións de traballo, sobre todo no que respecta á xornada. A maioría das traballadoras están a tempo parcial polo que quedan moitas veces ao arbitrio da empresa para ampliarlles a xornada. Do mesmo xeito salientan que o tempo que estas traballadoras dedican ao desprazamento para ir a cada lugar de traballo non lles computa como tempo de traballo efectivo. Desde que comezou a folga as traballadoras están celebrando todos os días concentracións diante das oficinas do Concello para denunciar publicamente a súa situación.

Confederación Intersindical Galega www.galizacig.com ÚLTIMA REVISIÓN: 14/02/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta