Actualidade / Opinión Santiago, 7 de xullo de 2006 Mentirosos e traidores   Silvia Bermúdez Pérez- CIG-Mocidade   Que forza misteriosa produciu semellante cambio de parecer? Acaso en maio Jose Mª Fidalgo e Cándido Méndez non opinaban o mesmo que en outubro?   Jose Mª Fidalgo, secretario xeral de CCOO, e Cándido Méndez, secretario xeral de UGT, veñen de asinar unha Reforma Laboral que entrou en vigor o día 1 deste mes. Entre outras moitas lindezas, a reforma xeraliza o abaratamento do despido introducido en 1997 polo desgoberno de Aznar. Mediante o mal chamado "contrato de fomento do emprego indefinido", en determinados supostos, os contratos temporais convertidos en indefinidos pasan a ter unha indemnización por despido de 33 días por ano traballado cun máximo de 24 mensualidades, en vez dos 45 días e 42 mensualidades do contrato ordinario. Agora os colectivos con despido barato son: Todas as mulleres. Homes menores de 31 anos e maiores de 45. Demandantes de emprego con 6 meses de antigüidade no paro. Persoas con discapacidade. Persoas en situación de exclusión social. Todos os contratos temporais celebrados antes do 1 de xuño sempre que a conversión se realice antes do 1 de xaneiro do 2007. Queda ben claro que o obxetivo é convertir esta modalidade no único contrato indefinido posíbel. Compre saber o que Jose Mª Fidalgo e Cándido Méndez pensaban sobre a proposta de reforma laboral que o goberno lles plantexaba en outubro de 2005. Así, o secretario xeral de CCOO sinalaba "damos la bienvenida a esta propuesta siempre que sea para mejorar la situación del empleo y no para abaratar los costes del despido", Fidalgo posicionábase en contra do abaratamento do despido argumentando que supondría "sustituir contratos fijos por fijos más baratos". Pola súa banda o secretario xeral de UGT se manifestaba no mesmo sentindo, declarando que o coste do despido "no es el principal problema del mercado laboral" (Diario Expansión, 18/10/2005). Que forza misteriosa produciu semellante cambio de parecer? Acaso en maio non opinaban o mesmo que en outubro? Xuzguen vostedes mesmos, eu xa non teño palabras.

Silvia Bermúdez Pérez, membro de CIG-Mocidade.

Confederación Intersindical Galega www.galizacig.com ÚLTIMA REVISIÓN: 07/07/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta