|
Actualidade
Santiago, 26 de xaneiro de 2006
Concentración diante da Casa do Concello
o luns 30 de xaneiro
Máis de 30 sentenzas condean ao alcalde
de Dozón por actuacións caciquís contra os traballadores
| |
 |
| Outra das accións previstas é
pór en marcha unha campaña contra as mutuas por dar altas indebidas. Non hai que esquecer que son
as responsábeis de que se lle dea a alta forzosa a persoas que, como Ana Lois Navaza (na foto),
non están en condicións de traballar, porque non teñen superado o problema que provocou a
baixa laboral. (Foto: ©galizacig.com). |
| |
Ana Lois Navaza, delegada da CIG no Concello
de Dozón, e os seus compañeiros de traballo teñen acumuladas máis de 30 sentenzas favorábeis
contra o alcalde, Adolfo Campos, por actuacións caciquís. Ana Lois Navaza, de baixa, a consecuencia
da situación que tivo que padecer no Concello é agora obrigada pola mutua a regresar ao posto de
traballo co seu acosador, malia os médicos especificar que non se pode reincorporar.
Diante desta situación a CIG convoca unha
concentración diante da Casa do Concello de Dozón o próximo luns, día 30 de xaneiro,
ás 11:00 horas para amosar a solidariedade coa compañeira e exixir que se arranxe esta situación.
O acoso que padecen tanto Ana Lois Navaza como
os seus compañeiros de traballo por parte do alcalde do PP, Adolfo Campos, tradúcese en retrasos
no pagamento dos salarios, apertura de expedientes, separación do posto sen encomendárselles funcións,
ubicación en locais sen as mínimas condicións (illados, sen calefacción, sen acceso
ao teléfono...).
A CIG considera que non se poden consentir este
tipo de actitudes, por iso, ademais desta concentración ten previsto realizar xestións coa Fiscalía
do Tribunal Superior de Xustiza de Galiza para que actúe e promover unha entrevista coa Inspección
de Traballo. Ademais diso, xa se levou o asunto ao Parlamento de Galiza, a través do grupo parlamentario
do BNG, para o seu debate en pleno.
Papel das mutuas
Outra das accións previstas é pór
en marcha unha campaña contra as mutuas por dar altas indebidas. Non hai que esquecer que son as responsábeis
de que se lle dea a alta forzosa a persoas que, como Ana Lois Navaza, non están en condicións de
traballar, porque non teñen superado o problema que provocou a baixa laboral.
Pero como a decisión das mutuas condiciona
posteriormente ao Sergas para que non se lle poda dar a baixa a esta persoa, a CIG tamén solicitará
unha entrevista coa conselleira de Sanidade para que a Sanidade pública galega adopte medidas que impidan
situacións como esta se repitan.
|
