Actualidade Santiago, 22 de xuño de 2005 A precariedade e a temporalidade provocan o incremento de accidentes laborais A Executiva Confederal da CIG acorda pór en marcha unha campaña contra a sinistralidade laboral   CIG-Comunicación- cig.prensa@galizacig.com   O preocupante incremento dos índices de sinistralidade laboral levaron á Executiva Confederal da CIG a acordar a posta en marcha dunha campaña de denuncia e en demanda de medidas que eviten que se sigan producindo.   Diante do lamentábel incremento de accidentes laborais, sobre todo daqueles con resultado de morte, a Executiva Confederal da CIG acordou pór en marcha unha campaña contra a sinistralidade laboral. Para iso, xa se solicitaron entrevistas con CCOO e UGT, coa intención de que se implique a toda a clase traballadora galega. O preocupante incremento dos índices de sinistralidade laboral levaron á Executiva Confederal da CIG a acordar a posta en marcha dunha campaña de denuncia e en demanda de medidas que eviten que se sigan producindo. Para implicar a toda a clase traballadora galega, a Executiva Confederal da CIG considerou oportuno iniciar conversas con CCOO e UGT para que sexa unha campaña conxunta. Diste xeito, unha delegación deste organismo, encabezada polo secretario confederal de Negociación Colectiva e Saúde Laboral, Antolín Alcántara, se entrevistará cos responsábeis das centrais sindicais, a fin de coñecer a súa dispoñibilidade. A Executiva responsabiliza do incremento da sinistralidade á cada vez maior precariedade laboral existente, á subcontratación e aos elevados índices de temporalidade. Por iso, entende que a Administración central debería encetar as modificacións lexislativas oportunas para combater tanto a temporalidade como as condicións das subcontratacións. Con este fin, a CIG defende a introdución, en todos os convenios colectivos, de topes máximos de temporalidade para reducila e diminuír así unha das principais causas da sinistrabilidade laboral. Ademais, considera que se deben dotar ás Inspeccións de Traballo con máis medios materiais e humanos, para que podan facer un seguimento máis eficaz das condicións de traballo nas empresas. Para coñecer directamente cales son as súas necesidades, a CIG considera que sería necesario concertar entrevistas coas distintas Inspeccións. Ao remate da campaña, cara finais de ano, a CIG proporá a convocatoria de mobilizacións, para exixir o cumprimento destes obxectivos.

Confederación Intersindical Galega www.galizacig.com ÚLTIMA REVISIÓN: 22/06/2005 cig.informatica