Actualidade Santiago, 12 de maio de 2005 Exixe unha investigación rigorosa e que se adopten medidas contra os responsábeis A CIG solidarízase coas familias dos traballadores mortos en Ferrol no accidente laboral de Navantia   CIG-Comunicación- cig.prensa@galizacig.com   Para a CIG é imprescindíbel que se actúe con todo rigor na aplicación e control das medidas de prevención de accidentes laborais, máis cando Galiza ten a maior porcentaxe de accidentes laborais do Estado español. (Foto: Vista aérea das instalacións de Navantia en Ferrol).   A CIG quere manifestar a súa solidariedade coas familias dos tres traballadores e a traballadora que finaron en accidente laboral na antiga Bazán –na actualidade Navantia– en Ferrol e cos seus compañeiros. Ao tempo, demanda que se realice unha investigación rigorosa para que se coñezan as causas que provocaron este accidente mortal nunha empresa na que non se tiñan producido accidentes graves nos últimos anos. A CIG espera que se actúe con dilixencia porque, tal e como explicou Suso Seixo, secretario xeral, en rolda de prensa, “estamos afeitos a que a fiscalía actúe contra os traballadores, con toda dureza, pero logo en conflitos destas características, onde hai mortos por medio, normalmente se procede con bastante benevolencia cos empresarios”. Para a CIG é imprescindíbel que se actúe con todo rigor na aplicación e control das medidas de prevención de accidentes laborais, máis cando Galiza ten a maior porcentaxe de accidentes laborais do Estado español. Concentración e paro de dúas horas en Ferrol pola morte dos catro traballadores de Navantia A CIG vén de convocar, xunto con UGT, USTG e CCOO un paro de dúas horas na comarca de Ferrol para o próximo venres día 13 de maio a partir das 11:30 horas. Ademais, convócase unha concentración na Praza de Armas, diante do Concello as 12:00 da mañá.

Confederación Intersindical Galega www.galizacig.com ÚLTIMA REVISIÓN: 12/05/2005 cig.informatica